Ұшақтағы йога

Йогамен айналысу үшін арнайы қолайлы жағдай керек деген пікір халық арасында жиі таралған. Бұл жерде əңгіме ерекше жабдықталған жер мен кеңістік жəне тыныштық жайлы болып отыр. Дегенмен іс жүзінде олай емес. Йогамен автобуста яки əуежайда, тіпті ұшақта шұғылдануға болады екен.
Əлбетте көп орын алып, ел назарын өзіне аударатын күрделі жаттығуларды көпшілік жерде жасау қисынсыз. Сондықтан біз ең қарапайым, алайда ұзақ жəне жүйкеге салмақ түсіретін көктегі сапардан соң бой жазуға көмектесіп, денеге қан жүгіртетін өте тиімді тəсілдерді ұсынбақпыз.


Ұшу кезіндегі йоганың пайдасы мен ондағы жаттығулардың әсерлері:

  • бұлшық еттерге қысымды азайтады;
  • қан айналымын жақсартады;
  • ой-сана мен барлық жүйке жүйесін сергітеді;
  • мазасыз күйді кетіреді;
  • қонған бетте адамға өзін сергек ұстап, белсенді қызмет етуін қамтамасыз етеді!

Қанша жайлы болса да, жұмсақ орындықта ұзақ тапжылмай отыру, адам ағзасына кері әсерін тигізіп, қанның қалыпты айналымын бұзады. Арқадағы және мойындағы, тізе мен табандағы бұлшық еттер ұйып қалады. Йогадағы оңай жаттығуларды жасау арқылы жолаушының өзін сезінуі жақсарып, саяхаты да жадыраңқы кейіпке енеді. Ал, бұл әрекеттерге аз ғана орын, ұшақ креслосы жетеді.

ЖАТТЫҒУ No1. ОТЫРҒАН КҮЙ АРҚАМЕН БҰРЫЛУ – омыртқа бойымен қан айналымы дұрысталады.
Креслоға тік отырып, аяқтарды еденге тең ұстау керек. Оң қолды сол тізеге қойған жөн. Сол қолды сол жамбастың артындағы орындыққа тіреу қажет. Ауаны ішке тартқанда арқаны тік ұстаған қалыпта кеудені көтеріңкіреген абзал. Содан соң сол иықтан қарай алатындай солға баяу бұрылыңыз. Тыныс алуды тоқтата тұрып, осы күйде бірер секунд бөгеліңіз. Осыдан кейін ауаны сыртқа шығарарда ақырындап іштің бұлшық еттерін солға бағыттаған райда көбірек қайырылыңыз. Қаттырақ бұрылу үшін сол тізедегі оң қолыңызды күшейтіңіз. Сегіз-он рет тереңінен демалыңыз.

Енді осы жаттығуды оң жаққа қайталаңыз.

ЖАТТЫҒУ No 2: ИЫҚТАРДЫ ҚОЗҒАУ – мойын омырт-қасы мен бұлшық ет және арқаның жоғарғы жағы үшін пайдалы.

Ыңғайлы жайғасып, омыртқа бойына оралған көрпені төсеп, креслоңызға арқаңызбен жатыңыз. Ауаны ішке баяу тартып, ұстап тұрыңыз. Иықтарыңызды көтере отырып, қолдарыңызды бос ұстаңыз. Содан соң иықтарыңызды құлақтарыңызға жақындатқан күйі қыса түсіңіз (бірақ денені ширықтырмау керек).

Сыртқа демаларда қос жауырынды бірге қысып, иықты төмен түсіру керек.
Бұл жаттығуды үш рет қайталаңыз.

ЖАТТЫҒУ No3. ОТЫРҒАН МЫСЫҚ КЕЛБЕТ – омырт-қадағы дұрыс қан айналымын қалыпқа келтіріп, ағзаның жалпы жағдайын көтеру үшін.
«Жұмыс орныңыздың» шетіне отырыңыз. Тізелеріңізді отыруға қолайлы болатындай қойыңыз. Табанды да тізелерге сай жайғастарыңыз.

Қолдарды жамбасқа қойып, демалған кезде сан мен құрсақ жағы сыртқа шығып, кеуде қуысы алға қарай күжірейіп, үстіге көтеріледі.
Демді шығарғанда барлығы қарама-қарсы орындалып, жамбас пен іш және кеуде ішке тартылады да, омыртқа сыртқа иіледі. Иек кеудені қозғалтқан сайын ішке қарай ене береді. Бұл йога қимылын төрттен алты ретке дейін қайталаңыз.

НАЗАР АУДАРЫҢЫЗ! МАҢЫЗДЫ!

Ұшақта аталған жаттығуларды орындау барысында, көршілеріңізге кедергі жасамауды ойлаңыз. Егер денсаулығыңызда ақау болса, йогамен айналыспас бұрын, дәрігермен ақылдасып алған жөн. Сондай-ақ көп су ішуді ұмытпаңыз.

Әрдайым деніңіз сау, жүрісіңіз ақ мамық бұлттай жеңіл болсын!

 

Leave a Reply

Your email address will not be published. Required fields are marked *

Яндекс.Метрика